Halijdiččih-uv vyelgiđ väzzimmookán, kost kuvviđ Wiki Loves Monuments várás?

Wiki Loves Monuments -väzzimijn uápásmuvvoo oovtâst páihálâš kulttuurärbičuosâttuvváid já toh kovvejuvvojeh. Siämmást uápásmuvvoo Wiki Loves Monumentsân, maailm stuárráámus čuovâkuvvimkiišton, moos puáhtá uásálistiđ väzzim ääigi valdum kuvijguin. Mield lii kuávlu historjá tobdee uápis. Väzzimeh kuleh Euroop Kulttuurpirâspeeivij ohjelmân.

Ravvuuh jieijâd Wiki Loves Monuments -väzzim ornimân

Tun puávtáh orniđ jieijâd Wiki Loves Monuments -väzzim, ležžeh te ornijdume, puđâldemjuávhu tâi veikâ skippáárjuávhu ovdâsteijee.

Mondiet orniđ čuovâkoveväzzim? Väzzimij mittomeerrin lii lääččiđ suotâs teivâdmijd čuovâkuvvim ooleest, levâttiđ tiäđulâšvuođâ kulttuuräärbi merhâšuumeest já Wiki Loves Monuments -kištoost, sehe ruokâsmittiđ ulmuid uásálistiđ toos. Oovtâst porgâm peht kulttuuräärbi teemah pääcih pyerebeht mielân, já šiälmá uásálistiđ kiišton puáhtá leđe vyeligub.

Äigi: Wiki Loves Monuments -kiišton puáhtá vuolgâttiđ kuuvijd čohčâmáánu ääigi. Tondiet kannat-uv orniđ väzzim čohčâmáánust tâi jo porgemáánust.

Čuosâttâhjuávkku: Puohah láá tiervâpuáttim uásálistiđ Wiki Loves Monumentsân! Kišto vááimus lii kulttuuräärbi vuorkkiimist, mutâ vyeitteekoveh láá távjá teknisávt šievkvaliteetliih já visuaallávt tubdâmušliih tâi kreatiivliih. Adai kišto heivee nuuvt astoäigikovvejeijeid ko argâpeeivij puhelinkovvejeijeid.

Päälgis: Väzzimpäälgis mana kuvvimčuosâttuvâst nuubán. Čuosâttuvah väljejuvvojeh kišto káártást. Pálgá puáhtá rähtiđ ovdâmerkkân jieijâs aldakuávlun tâi historjálávt mielâkiddiivâš kaavpuguásán, mutâ toos puáhtá meiddei valjiđ teema (om. arkkitehtuurân tâi äigipajan lahtojeijee). Nube tááhust väzzim puáhtá leđe čuovâkuvvimmokke ovtâskâs kulttuurärbičuosâttâhân (om. Suomâlanne), mon kuávlust lii ennuv maid kuvviđ.

Uásálisteemeeri: Uásálistei stuárráámus meeri sorjo iänááš väzzim raamijn (kost vuáđustemsaahâ tuálloo já lii-uv kááđuin saje stuárráb juávkun). Wikimedia Suomâ čuovâkuvvimväzzimijn stuárráámus uásálisteemeeri lii táválávt suulân 20 olmožid.

Pištem: Väzzim pištemin avžuuttep 1-2 tijme. Kuhheeb-uv väzzim tuáimá, jis uásálisteeh láá säävrih. Meiddei pyerámokke lii máhđulâš.

Äigitavlu:Aalgân kannat väridiđ ääigi 10-20 miinut vuáđustemsaahân, mast čielgiđ kišto ulme já njuolgâdusâid. Ko väzzimân kulá kuvvim já savâstâllâm, toi ritmâ mulsâšud uásálistee juávhu mield. Motomeh tarbâšeh kuvvimân ennuv ääigi, já nubeh láá valmâšeh tállân. Kannat vuáváđ äigitaavlu njyebžilin já väldiđ mottoom paijeelmiärálii čuosâttuv väärrin. Jis uásálisteeh láá ennuv, kuvvimpuddáid puáhtá sooppâđ čielgâ pištem (om. 15 min), mon maŋa juátkiđ määđhi. Loopâst lii pyeri moonnâđ čoođâ Wikimedia Commonsân registeristem já kuuvij luođim toho. Kuohtuuh lukkojeh älkkeht kišto nettisiijđoi “Vuolgât čuovâkove!” -liiŋkâ peht.

Iävtuttâsah vuáđustemsaavâ fáddán: Wiki Loves Monuments vuáđujuurdâ já ton njuolgâdusah, kulttuuräärbi vuorkkim merhâšume, ovdebái iivij kištokoveh Suomâst já almugijkoskâsii kištoost. Vuáđustemsaavâst lii pyeri mainâšiđ, ete puohah pyehtih luođiđ já kevttiđ kiišton vuolgâttum kuuvijd Creative Commons BY-SA -liiseens raamij siste.

Tieđettem: Euroop kulttuurpirâspeeivih láá ive 2024 Wiki Loves Monuments ohtsâšpargokyeimi já almostit aainâs WLM-väzzimijd tábáhtuskalenderstis. Mij avžuuttep kevttiđ fáddátubdâlduvâid #wlmSuomi já #wikilovesmonuments sosiaallii mediast.

Mondiet uásálistiđ Wiki Loves Monumentsân?: Wiki Loves Monuments -kiišton uásálistem lii tehálâš, ko jyehi uásálistee kove stuárud mii kulttuuräärbist muštâleijee já ton dokumentistee jotkum. Tot lii tiätunuurrâmproojeekt, mast kii peri puáhtá uásálistiđ mii pirrâs ohtâsii mainâs vuorkkiimân, jieijâs keččâmkuávlust. Wiki Loves Monumentsist šaddee koveh láá teháliih tiätukäldeeh maaŋgâlágán kevtteid Wikimedia Commons peht. Toh dokumentisteh nubástuvvee enâduv: taat äigi lii puátteevuođâ historjá. Tondiet kišto uárnejuvvojeh távjá ohtsâšpargoost ovdâmerkkân museotuáimeiguin.

Vääldi ruokkâdávt ohtâvuođâ, jis tust láá koččâmušah väzzim ornimist! Mij kulâččijm meiddei aainâs, jis tun meridah orniđ väzzim, já pyehtip tieđettiđ väzzimist jieččân nettisiijđoin jis tun halijdah.