Haaʹleʹčiǩ-a vueʹlǧǧed mieʹldd väʒʒmõʹšše, koʹst sniimât Wiki Loves Monuments vääras?

Wiki Loves Monuments -väʒʒmõõžžin tobdstõõđât õõutsââʹjest pääikla kulttuuräʹrbbvuõttpaaiʹǩivuiʹm da sniimât tõid. Seämmast tobdstõõđât Wiki Loves Monumentsin, maaiʹlm šuurmõs sniimmâmǩeâšttõõttmõõžžin, koozz vuäitt vuässõõttâd väʒʒmõõžžâst rajjum snimldõõǥǥivuiʹm. Väʒʒmõʹšše puätt mieʹldd vueʹppes, kååʹtt tobdd vuuʹd histoor. Väʒʒmõõžž lie Euroop Kulttuurpirrõspeeiʹvi prograamm vueʹss.

Vuäʹppõõzz jiijjâs Wiki Loves Monuments -väʒʒmõõžž jäʹrjstem vääras

Vuäitak jäʹrjsted jiijjâd Wiki Loves Monuments -väʒʒmõõžž, huõlǩâni tõʹst, leäk-a organisaatio, staarjõsjoouk leʹbe taaurõšjoouk eeʹttiǩ.

Mõõzz jäʹrjsted sniimmâmväʒʒmõõžž?: Väʒʒmõõžži mieʹrren lij kaaunõõttâd sniimeeʹl, čõõđted kulttuuräʹrbbvuõđ miârktõõzz da Wiki Loves Monuments -ǩeâštõõttmõõžž, di smeʹllkâʹtted oummuid vuässõõttâd tõõzz. Õõutsââʹjest raajeeʹl kulttuuräʹrbbvuõđ teeʹm päʹcce pueʹrben miõʹlle, da ǩeâšttõõttmõʹšše vuäitt leeʹd hiâlpab vuässõõttâd.

Ääiʹjpodd: Wiki Loves Monuments -ǩeâštõõttmõʹšše vuäitt vuõltteed snimldõõǥǥid ceâlai čõhččmannu ääiʹj, nuʹtt što kaʹnnat jäʹrjsted väʒʒmõõžž čõhččmannust leʹbe juʹn påʹrǧǧmannust.

Ǩeän vääras Wiki Loves Monuments lij?: Juõʹǩǩʼkaž vuäitt vuässõõttâd Wiki Loves Monuments – ǩeâštõõttmõʹšše! Ǩeâštõõttmõõžž mieʹrren lij ruõkkâd kulttuuräʹrbbvuõđ, leâša vuõiʹttisnimldõõǥǥ lie täujja teknlânji pueʹrr di visuaalʼlânji toobdâlma da hoʹhssji. Ǩeâštõõttmõš suåpp nuʹtt tõid, ǩeäk staarjâʹtte sniimmʼmõõžž da takai oummuid še, kook laaʹvje sniimmâd teʹlfoonin.

Ǩeäinn: Väʒʒmõõžžâst jååʹđet sniimmâmpääiʹǩest nobba. Sniimmâmpaaiʹǩid vaʹlljeet ǩeâštõõttmõõžž kaartâst. Ǩeäin vuäitt vaʹlljeed håʹt mâka jiijjâs âʹlddvuuʹdest leʹbe histoorlʼlânji miõl ǩiõssi gååradvuuʹdest, leâša tõõzz vuäitt še vaʹlljeed teeʹm (ouddm. koon-ne arkkitehtuur šlaaʹj leʹbe ääiʹjpoodd). Väʒʒmõš vuäitt leeʹd še sniimmâm-mäʹtǩǩ koon-ne kulttuuräʹrbbvuõttpäikka (ouddm. Suomenlinna), koon vuuʹdest käunnʼje mäŋgg sniimmâmpääiʹǩ.

Vuässõõttimieʹrr: Vuässõõttimieʹrr šâdd jeänmõsân väʒʒmõõžž mieʹldd (koʹst tõt älgg da kâʹll oummuid lij sââʹjj ǩeäin kuâŋŋsest). Wikimedia Lääʹddjânnam sniimmâmväʒʒmõõžžid vuäiʹtte takai vuässõõttâd nuʹtt 20 ooumžed.

Peštt: Siâzztõõllâp, što väʒʒmõš peštt 1-2 čiâss. Vuäitak jäʹrjsted kuuʹǩǩab väʒʒmõõžž še, jõs tõt heiʹvvai vuässõõttjid. Vuäitak jäʹrjsted še sniimmâm-maaʹtǩid, koin vuâjat tanccâmkååʹlzin.

Äiʹǧǧtaull: Aalgâst kaʹnnat ââʹnned 10-20 minuttâd ǩeâštõõttmõõžž miârktõõzzi da vuâkkõõzzi vääras. Tõn diõtt ko väʒʒmõʹšše kollai sniimmʼmõš da mainstummuš, väʒʒmõõžž rytmm vaajtââll vuässõõttji mieʹldd. Ǩeäk-ne taarbše jiânnai ääiʹj sniimmʼmõʹšše da jeärraz lie tâʹlles vaalmâ. Kaʹnnat plaaneed äiʹǧǧtaaul nuʹtt, što tõn vuäitt taarb mieʹldd mottjed, jõs lij čuuʹt jiânnai äiʹǧǧ, vuäitt mõõnnâd sniimmâd koon-ne lââʹsspäikka. Jõs lie mäŋgg vuässõõđi, vueiʹtet sniimmâmpooddid suåppad čiõlǥâs äiʹǧǧmeäʹr (ouddm. 15 min), koon mâŋŋa vueʹljet ooudâs. Looppâst kaʹnnat mainsted registâttmõõžžâst Wikimedia Commoʹnsse da mäʹhtt tõõzz vuäitt ruõkkâd snimldõõǥǥid. Kuhttu lie hiâlpp tueʹjjeed ǩeâštõõttmõõžž neʹttseeidai “Vuõlttâd snimldõõǥǥ!” -liiŋk pääiʹǩ.

Eʹtǩǩõõzz alttõõzz teeʹmmen: Wiki Loves Monuments vuâđđjuurd da tõn vuâkkõõzz, kulttuuräʹrbbvuõđ ruõkkmõõžž miârktõs, ooudbu iiʹjji ǩeâštõõttmõš-snimldõõǥǥ Lääʹddjânnmest da meeraikõskksâž ǩeâštõõttmõõžžâst. Alttõõzzâst lij pueʹrr särnnad, što ǩeâštõõttmõʹšše vuõlttum snimldõõǥǥid vuäiʹtte puk laaddâd da ââʹnned Creative Commons BY-SA -liseens mieʹldd.

Teâđtõs: Euroop kulttuurpirrõspeeiʹv lie eeʹjj 2024 Wiki Loves Monuments õhttsažtuâjjla da õlmstâʹtte pueʹrin miõlin WLM v-äʒʒmõõžžid sij šõddmõškaʹlndaarâst. Siâzztõõllâp ââʹnned sosiaalʼlaž mediast teeʹmmtiõttid #wlmSuomi da #wikilovesmonuments.

Mõõzz vuässõõttâd Wiki Loves Monuments -ǩeâštõõttmõʹšše?: Wiki Loves Monuments – ǩeâštõõttmõʹšše vuässõõttmõš lij vääžnai, tõn diõtt ko juõʹǩǩ vuässõõtti snimldõk lââʹzzat tiõđ da dokumeʹnttâstt kulttuur äʹrbbvuõđsteen. Tõt lij tiõđnoorrâmprojeʹktt, kåʹst ǩii täättas vuäitt vuässõõttâd pirrõssân õhttsaž mainnâz ruõkkmõʹšše jiijjâs vueiʹnnemkuuʹlmast. Wiki Loves Monumentsest valddum snimldõõǥǥ lie vääžnai tiõđkääiv mäŋggnallšem õõʹnnʼjid Wikimedia Commons pääiʹǩ. Tõk dokumeʹntâʹstte mottjeei pirrõõzz: ânnʼjõžäiʹǧǧ lij puõʹtti ääiʹj historia. Tõn diõtt ǩeâštõõttmõõžž täujja jäʹrjstet õhttsažtuâjast ouddmiârkkân muʹzeeʹjivuiʹm.

Vääʹld smellkânji õhttvuõđ, jõs tuʹst lie kõõččmõõžž väʒʒmõõžž jäʹrjstummšest! Haaʹleʹčim kuullâd tõʹst še, jõs ääiǥak jäʹrjsted väʒʒmõõžž, da jõs haaʹlääk, vueiʹttep teâđted väʒʒmõõžžâst mij neʹttseeidain.