Máilmmi stuorimus čuovgagovvengilvu Wiki Loves Monuments lágiduvvo fas čakčamánus.
Máilmmi stuorimus čuovgagovvengilvu Wiki Loves Monuments lágiduvvo Suomas ja miehtá máilmmi 1.–30.9.2024.
Dán jagi temán lea Geainnut ja geaidnoearut, fávllit ja fierpmádagat, mii lea maiddái Eurohpá kulturbirasbeivviid jahketemá. Temá movttiidahttá govvet ruovdemáđiibirrasiid, kanálaid, šaldiid, museageainnuid, Eurohpá ráđi kulturgeainnuid ja virggálaš mátkkoštangeainnuid sihke daid guoras gávdnojeaddji čuozáhagaid.
Gilvui sávvat erenoamážit govaid dakkár čuozáhagain, mat leat govvejuvvon unnán. Vuolggesmat de dutkanmátkái iežat birrasii ja oza báikkiid, visttiid dahje luonddučuozáhagaid, maid earát eai leat fuobmán govvet! Ovdal govvekeahtes čuozáhagat leat merkejuvvon gilvvu kártái rukses ivnniin.
Mo oassálastit
Wiki Loves Monuments -gilvui sáhttá oassálastit čuovgagovaiguin, main oidno suodjaluvvon dahje muđui dehálažžan meroštallon kulturárbečuozáhat, mii gávdno gilvvu kárttás.
Vurke gilvui oassálasti govaid 1.–30.9.2024 govvabáŋku Wikimedia Commonsii, gos dat leat buohkaid friddja geavaheamis Creative Commons BY-SA 4.0 -liseanssain. Sáhtát oassálastit iežat govven govaiguin, mat leat govvejuvvon jagi 2024 áiggi dahje ovdal.
Erenoamážit gánneha fuomášit
- Muitte gudnejahttit priváhttavuođa. Juos háliidat govvet priváhtta guovllus, bivdde govvemii eananoamasteaddji lobi. Go govain oidnojit olbmot, sihkkarastte, ahte oaččot govvejuvvon olbmuin miehtama gova almmustahttimii.
- Dronagovvemis leat iežas njuolggadusat, nu ahte amma muittát váldit vuhtii dasa laktáseaddji virgeoapmahašrávvagiid.
Gilvvu lágida Wikimedia Suomi rs, ovttasbargoguoibminis Museavirgedoaimmahat, Eurohpá kulturbirasbeaivvit ja Ruovttuguovlolihttu. Gilvu lágiduvvo Suomas jo čihččet geardde. Ulbmilin lea movttiidahttit mielde nu viiddes olmmošjoavkku go vejolaš ja dahkat kulturárbbi oinnolažžan ja dovddusin.
