Maaiʹlm šuurmõs sniimmâmǩeâlb Wiki Loves Monuments rieʹššeš Lääʹddjânnmest da jeeʹres åʹrnn maaiʹlm 1.9.–31.9.2022. Tän vuâra teeʹmmen leäi piʹštti äʹrbbvuõtt, kååʹtt leäi Euroopp kulttuurpirrõspeeiʹvi eeʹǩǩteeʹmmen še. Lääʹddjânnam rääid vuõiʹttjen vaʹlljeeš Teuvo Salmenjoki suu snimldõõǥǥin Hanko-gåårad ââlda åårrai Gustavsvärn kreäpstest.

Ǩeâlb ärvstõõlli miõlâst luâtt da oummu raajjâm kulttuuräʹrbbvuõtt õhttâʹvve moččânji snimldõõǥǥâst. Kreäppast ǩieʹđji da luâđ raajjâm šõʹlles kaʹlli kõõskâst lij kontrastt. Põʹlvves kååškõõǥǥ teeʹmes čuõvv pohtt ouʹdde kueʹstelm da pääiʹǩ jiiʹjjesnallšemvuõđ da oudd vuäittmõõžž tuʹtǩǩeed tõn raajõõzz uʹcc aaʹššid. Snimldõõǥǥ liinj räʹjje tõn kõskkpäikka miõllǩiõssi nalla risttsymboolân. Snimldõõǥǥâst vuäitt vueiʹnned spraavdõõttâm-mainnâz šââddteʹmes luâđ kõõskâst da suâlvuuʹd mårššai mooččâdvuõđ.

Cisttân aaunâs-sǩiâŋkk-koort da päiʹǩǩ meeraikõskksaž ǩiõlbbu

Lääʹddjânnam ǩeâlb vuäittam snimldõʹǩǩe uuʹdet 200 eeur sniimmâmaaunâs-sǩiâŋkk-koort. Lååi pueʹrmõs snimldõõǥǥid uuʹdet Muʹzei-koort, da tõk mâʹnne ooudâs meeraikõskksaž ǩiõlbbu, koon puättmõõžž õlmstââʹttet täʹlvvmannu da pâʹsslašttâm-mannu jåårǥlõõǥǥâst.

Meeraikõskksaž ǩiõlbbu peäʹsse Salmenjoki snimldõõǥǥi lââʹssen čuâvvai sniimmi snimldõõǥǥ:

 

 

 

 

 

 

 

 

Oʹđđest sniimmâmrääidast ruõʹǩǩeš kueʹstelm mottjummuž

Lääʹddjânnmest jäʹrjsteš Wiki Loves Monuments -ǩeâlb õhttvuõđâst oʹđđest sniimmâmrääid še, mâʹst sniʹmmeš oʹđđest histoorlaž snimldõõǥǥi kueʹstlmid. Ǩeâlbast vuâmmšeš jeäʹrben Marit Henriksson suu snimldõõǥǥin Ruoholahti muõrrpõõrtin, Heʹlssnest. Tõt raajj heärvvas paarr čueʹđ määʹrǩ muõrrpõõrtin õõutâst Eeva Rista 1970-lååǥǥ snimldõõǥǥin.

Henriksson snimldõʹǩǩe uuʹdet 100 eeur sniimmâmaaunâs-sǩiâŋkk-koort da Muʹzei-koort.

Miõllǩiõssi snimldõõǥǥ modeʹrnn arkkitehtuurâst

Ǩiõlbbu vuõltteeš 928 snimldõõǥǥ 55 vuässõõttjest. Tän eeʹjj riâššid rämmšõʹtte jeäʹrben miõllǩiõssi snimldõõǥǥ funktionalistla da modeʹrnn kulttuuräʹrbbvuõđâst. Ǩiõlbbu vuõltteeš mäŋgg snimldõõǥǥ nåkam kulttuuräʹrbbvuõttpaaiʹǩin še, koin ij leämmaž ouddâl snimldõk Wikipediast.

Wikimedia Suomi ry riâžži ǩeâlb õõutâst Euroopp kulttuurpirrõsveeiʹvivuiʹm, Hyvinkää gååradmuʹzeeʹjin, Kerava muʹzeikääzzkõõzzivuiʹm, Lapua gåårad muʹzeeʹjivuiʹm, Museovirastoin, Nurmijärvi muʹzeeʹjin, Riihimäki gååradmuʹzeeʹjin da Tuusula muʹzein. Ǩeâlb rieʹššeš Lääʹddjânnmest juʹn kuuđâd vuâra. Täävtõssân lij älšsmâʹtted mieʹldd nuʹtt jiânnai oummu go vueiʹtlvaž da raajjâd kulttuuräʹrbbvuõđ kuâsttjeeʹjen da tobddsen.

Lââʹssteâđ
Kimmo Virtanen, Wikimedia Suomi ry
kimmo.virtanen@wikimedia.fi, +358 44 022 4007