Suomâ rááiđu vyeitten väljejui Ragnar Ljusström atmosfárlijn ijjâkuvijdiskuin

Maailm stuárráámus čuovâkuvvimkišto Wiki Loves Monuments läjidui Suomâst čohčâmáánust já jieškote-uv kuávluin maailmist 1.9.–31.10.2021. Teeman lâi taan tove ovdil kuvviihánnáá enâdâh, adai čuosâttuvah moh láá kovvejum harvii. Suomâ rááiđu vyeitten väljejui Ragnar Ljusström kuvijdiskuin Pasila kesseetaalijn sehe Suvilahti kaasukiälust.

Pasila kesseetaalih

Tuámmárij mielâst kooveest lâi kiäsutteijee geometria, junátaalij já kiskoi kaavâin lii lihâstâs tegu virde jorreečaasijn. Suoivui já čuovâi kontrast lii eromâš muččâd. Kooveest lii meiddei jotoenergia, já tot čáittá jieijâs čuosâttuv uđđâ keččâmkuávlust.

Helsig Pasila kesseetaalih iho, 27.9.2021, Ragnar Ljusström

 

Suvilahti kaasukiällu

Iijâ sevŋâdâsâst pajaneijee kaasukiälu ruopsis čuovah láá tarvanâm muččâdávt kován já hokâttâleh kuvâttâllâđ, mii tiijdâid huksiittâsâst kávnoo? Miärkká já čuovah taheh kován mysteerlijd tubdâmušâid. Kaasukiälu fabriknálásâš, kiärdulâš rááhtus já ton čođâtteijee miärkká láá kiäsutteijee ovtâstume.

Helsig Suvilahti stäälist rahtum kaasukiällu iho sahis miärhá siste, 11.9.2021, Ragnar Ljusström.

 

Palhâšummeen skeŋkkâkoortah já päikki almugijkoskâsâš kiišton

Suomâ kišto vuáittám kove palhâšuvvoo 200 euro čuovâkuvvimtarbâšskeŋkkâkorttáin. Love pyeremus kovveed palhâšuvvojeh Museokorttáin, já toh ovdáneh almugijkoskâsâš kiišton, mon puátuseh almostittojeh kuovâ-njuhčâmáánu molsomist.

Ljusström kuuvij lasseen almugijkoskâsâš rááiđun ovdánii čuávuvái kovvejeijei koveh:

Ohtakari suálui já kuálásteijeekylá Kokkolast, 1.11.2019, Teuvo Salmenjoki

 

Suomâlanne, 6.5.2014, Igor Gordeyev

 

Varkaus pááppárfabrik, 24.9.2017, Esko Räntilä

 

Katajanokanluoto luoccivahtiittâhtupe Helsigist, 30.8.2021, Joneikifi

 

Tampere tuámukirkko, Hugo Simberg rähtim uurguluptâstuv lasâmáálám “Aurinkoikkuna” (“Piäivášlaasâ”), 30.5.2018, Ilkka Alavalkama

 

Noormarkku ruuki sááhá, 22.8.2021, Teuvo Salmenjoki

 

Siltasaarenkatu 13 Helsigist, tyehin Kallio kirkko, 5.9.2020, Marit Henriksson

 

Sigrid Juselius mausoleum Porist, 26.9.2021, Kallerna

 

Uđđâsistkuvvimrááiđust vyerkkejui enâduv nubástum

Suomâst läjidui Wiki Loves Monuments -kišto ooleest meiddei uđđâsistkuvvimráiđu, mast historjálij čuovâkuuvij uáináttuvah kovvejuvvojii uđđâsist. Kištoost huámmášui eromâšávt nommâmerkkâ Onkivesj kuvijnis Sorsakoski fabrik paajeeb tyejivisteest. Kove lii tärhis čááitus tast, maht historjálâš fabrikpiirâs lii sirdum onnáá piäiván.

Onkivesj, 2021

Victor Barsokevitsch, 1915

Onkivesj-nommâmeerhâ kove palhâšuvvoo 100 euro čuovâkuvvimtarbâšskeŋkkâkorttáin já Museokorttáin.

Droonikuvvim lassaan

Suomâ rááiđu kiišton vuolgâttuvvojii ohtsis 859 kovveed 57 uásálistest. Taan ive mield lijjii eromâš fijnâ droonikoveh, moi kovvejeijein kuáhtás válduseh pessii almugijkoskâsâš rááiđun. Taan tove uážžojii meiddei ennuv koveh eromâšávt tagarijn kulttuurärbičuosâttuvâin, main iä lam ovdil koveh Wikipediast.

Wikimedia Suomi rs läjidij kišto ohtsâšpargoost Museovirgáduváin sehe Kerava museopalvâlusâiguin. Kišto läjidui Suomâst jo viiđâd tove. Mittomeerrin lii movtijdittiđ mield nuuvt vijđes olmoošjuávhu ko máhđulâš já toohâđ kulttuuräärbi uáinulâžžân já tobdosin.

Lasetiäđuh:

  • Kimmo Virtanen, Wikimedia Suomi rs, kimmo.virtanen@wikimedia.fi, +358 44 022 4007